Víðtæk leit var gerð að spænskum manni sem hugðist ganga frá Hrafntinnuskerjum suður að Álftavatni en hafði ekki skilað sér þangað. Hann reyndist hafa gist á Kirkjubæjarklaustri.

Klukkan þrjú að morgni miðvikudagsins 3. ágúst barst útkall frá svæðisstjórn á svæði 1 vegna hjálparbeiðnar frá svæðisstjórn á svæði 17. Þar höfðu björgunarsveitir frá Hellu, Hvolsvelli og nágrenni, auk leitarhunda, verið við leit frá því kvöldinu áður að spænskum ferðamanni sem saknað var. Hann hafði gist í Hrafntinnuskerjum og var búinn að bóka pláss í skálanum við Álftavatn næstu nótt og í Emstrum þar næstu nótt. Þegar hann hafði ekki skilað sér í tíma að Álftavatni var farið að óttast um hann enda veðrið allt annað en ákjósanlegt til göngu, þoka, rigning og 4 stiga hiti. Frá Flugbjörgunarsveitinni fóru tveir bílar með 10 menn til leitar á svæðinu og tveir fulltrúar í svæðisstjórn.

Um 100 björgunarmenn auk þyrlu Landhelgisgæslunnar TF-SIF voru að kemba svæðið frá Landmannalaugum að Álftavatni og á líklegum stöðum í grennd þegar maðurinn komst í leitirnar austur á Kirkjubæjarklaustri, en þar hafði hann gist þá um nóttina. Í ljós kom að í stað þess að halda áfram að Álftavatni hafði hann ákveðið að breyta ferðaáætlun en upplýsingar um það lágu ekki fyrir.

Leit var því afturkölluð laust upp úr hádegi en Flugbjörgunarsveitin fékk svo það verkefni á heimleiðinni að flytja eldsneytisbíl Landhelgisgæslunnar frá Hvolsvelli til Reykjavíkur.