Um helgina fór fram sala á Neyðarkallinum þetta árið. Sölufólki okkar var tekið mjög vel og gekk salan samkvæmt björtustu vonum. Flugbjörgunarsveitin vill þakka öllum þeim sem styrktu sveitina og aðrar björgunarsveitir, með kaupum á Neyðarkallinum, fyrir stuðninginn. Það er þessi stuðningur sem gerir sveitunum kleift að halda úti þessu starfi og bregðast við þegar aðstoðar er þörf. Takk fyrir!
Sala á Neyðarkallinum 2013 hefst á fimmtudaginn og nú er búið að skýrast hvernig kallinn lítur út. Í ár er Neyðarkallinn kvennkyns og af sjúkrasviði. Við hvetjum alla til að sýna stuðning í verki og kaupa kallinn af einhverjum af því fjölmarga björgunarsveitafólki sem verður að selja kallinn næstu daga. Eins og fyrr kostar stykkið 1500 krónur og fer í uppbyggingu og þjálfun björgunarsveitafólks.
Þessa helgi eru báðir nýliðahóparnir á fullu í þjálfun, en fyrra árið situr námskeið í fyrstu hjálp undir leiðsögn sjúkrahópsins og fulltrúar fjallasviðs fara yfir félagbjörgun á Sólheimajökli með seinna árinu.
Í heild eru um þrjátíu nýliðar í húsi í fyrstu hjálparæfingum, en auk þess koma þó nokkrir inngengnir að þjálfuninni. Þegar kíkt var niður í hús áðan var meðal annars verið að fara yfir hjartahnoð, hjartastuðtæki og þríhyrningana.
no images were found
Í gærkvöldi fór fram búnaðarbasar ÍSALP í húsnæði FBSR, eins og venja hefur verið síðustu ár. Gekk kvöldið vel og fjölmargir lögðu leið sína til að athuga hvort hægt væri að gera góð kaup á ýmiskonar varningi.
Meðfylgjandi myndir tala sínu máli.
no images were found
Næsta miðvikudag 2.okt kl. 20 munu Flugbjörgunarsveitin í Reykjavík og ÍSALP standa fyrir Búnaðarbasar í húsakynnum FBSR v/Flugvallarveg. Þetta er tilvalið tækifæri til að losna við gamla búnaðinn sem þið notið ekki lengur eða til að næla ykkur í dót á billegu verði. Þeir sem ætla að vera með sölubás mæti kl. 19.40!
no images were found
Á laugardaginn var haldið upp á að 50 ár eru liðin frá því að fyrsti B-flokkur var stofnaður innan Flugbjörgunarsveitarinnar í Reykjavík, en hann hefur það að markmiði að þjálfa nýliða til Björgunarstarfs. Fjöldi félaga og gesta komu til að halda daginn hátíðlegan og gæða sér á kræsingum.
Myndirnar eru teknar af Jóni Svavarssyni, en fleiri myndir má finna hér.
no images were found
Í dag héldu fimm fræknir Flubbar út til Annecy í Frakklandi þar sem ætlunin er að kynna sér starfsemi fjallabjörgunarsveitarinnar og slökkviliðsins á svæðinu. Heimsóknin mun vara í eina viku, en hún er hluti af samstarfssamningi sveitanna tveggja um gagnkvæmar heimsóknir annað hvert ár. Meðlimir frönsku sveitarinnar munu svo í vor koma í heimsókn til Íslands þar sem meðlimir FBSR kynna þeim fyrir íslenskum aðstæðum.
Það eru þau Sigríður Sif, Siggi Anton, Jón Smári, Kári og Hlynur sem fara í heimsóknina þetta árið fyrir okkar hönd, en líklega fá þau að kynnast klifri í frönsku Ölpunum og gestrisni sveitarinnar GMSP 74 (Le Groupe Montagne de Sapeurs-Pompiers de la Haute-Savoie) á næstu viku.
Frá heimsókninni fyrir tveimur árum. – Mynd/Sveinborg.
Frá heimsókninni fyrir tveimur árum. – Mynd/Sveinborg
Kæru félagar.
Eins og áður hefur komið fram ætlum við að hittast n.k. laugardag 28. sept. á milli kl. 11.00 og 13.00 og eiga góða stund saman í félagsheimili okkar til að minnast þess að 50 ár eru í þessum mánuði síðan fyrsti nýliðahópurinn var stofnaður.
Góðar veitingar verða á boðstólnum og vonandi mikið af félögum sem láta sjá sig. Gott tilefni til þess að hittast og spjalla.
Bestu kveðjur og sjáumst sem flest þarna.
Stjórn FBSR
Nýliðar á fyrsta ári héldu á Esjuna síðustu helgi og fóru meðal annars um Laufskörð og upp á Hátind.
Meðfylgjandi er myndband frá ferðinni og leiðarlýsing frá Hauki Eggertssyni.
Við byrjuðum ferðina við Fossá í Hvalfirði og gengum upp eftir henni, inn Seljadal til móts við samnefnt eyðibýli hvar við tjölduðum um nóttina. Daginn eftir héldum við suður yfir hálsinn og ofan í Kjós við Vindáshlíð. Héldum stutta leitaræfingu í sumarbústaðarhverfinu í minni Svínadals áður en haldið var upp á Möðruvallaháls, og hann síðan genginn til suður um Höggin og upp á Trönu, þaðan upp á austasta (og hæsta) Móskarðshnúkinn og síðan niður hjá hjá Bláhnúki og tjaldað undir honum. Á sunnudag fórum við aftur upp hjá Bláhnúki og upp á hrygginn á milli 2. og 3. Móskarðshnúks (talið frá austri), vestur eftir hryggnum, yfir Laufaskörð og sem leið liggur upp á Hátind og þaðan niður í Grafardal, yfir Þverárkotsháls hvar FBSR 7 beið okkar við vaðið yfir Skarðsá.
Fyrsta nýliðaferð B1 hópsins var farinn um helgina, en 39 nýliðar fóru, ásamt fimm inngengnum og bílstjórum. Haldið var á Heiðina háu og gengið frá Selvogi norður að Draugahlíðum þaðan sem farið var að Kistufelli. Gist var í gígnum og daginn eftir haldið að Fagradal og þaðan að Kaldárseli.
Gott veður var á hópinn fyrri daginn, en það gekk svo yfir með skilum seinni partinn og gustaði vel um hópinn áður en tjaldað var. Þegar búið var að elda kvöldmat og koma sér í tjald kom svo heljarinnar rigning í bland við slagveðrið og reyndi vel á tjöld hópsins. Eitt tjaldið endaði með að fjúka stutta leið eftir hetjulega tilraun tjaldbúa til að halda því föstu og þurfti því að troða í önnur tjöld. Að öðru leiti gekk ferðin að óskum og var góður rómur gerður að ferðinni í lokin, þrátt fyrir að sumum hafi ekki litist á blikuna í upphafi.
Næsta ferð nýliðahópsins verður eftir tæplega tvær vikur, en hún verður kynnt síðar.
Meðfylgjandi má sjá myndskeið sem einn meðlimur hópsins, Gísli Jóhannesson, tók og setti saman: