Hópur frá Flugbjörgunarsveitinni í Reykjavík tók þátt í að aðstoða íbúa höfuðborgarsvæðisins í gær vegna veður, en sent var út heildarútkall. Þeir Viktor, Sveinn Hákon, Arnar S, David K og Stefán Már mættu og fengu meðal annars það verkefni að koma lausum plötum af vinnupalli við hátt hús í skjól. Þá var Þráinn í heimastjórn.
Útkallið var svo afturkallað fljótlega eftir sjö, en veðurofsinn var nokkru minni en búist hafði verið við.
Nýliðakynningar Flugbjörgunarsveitarinnar í Reykjavík verða haldnar þriðjudaginn 27. ágúst og miðvikudaginn 28. ágúst kl. 20.00 í húsnæði sveitarinnar við Flugvallarveg.
Ert þú 18 ára og eldri og gætir þú hugsað þér að fara út í brjálað veður þegar aðrir eru í neyð? Hefðir þú áhuga á að stunda fjalla- eða jeppamennsku, starfa með vélsleða- eða fisflugvélahóp, vera í sérhæfðum leitar- eða sjúkrahóp eða jafnvel fara í fallhlífastökk? Kannski áttu þá erindi til okkar!
Flugbjörgunarsveitin á yfir 60 ára sögu og innan sveitarinnar eru nokkur hundruð félagar. Auk námskeiða og nýliðaferða er fjölbreytt félagsstarfsemi, æfingar og ferðir á vegum sveitarinnar.
Fyrstu nýliðafundirnir verða þriðjudaginn 3. september og fyrsta ferð 6-8. september. Allir sem eru áhugasamir um starfið eru velkomnir á kynningarfundina 27. og 28. ágúst.
Þriðjudagskynningin á Facebook
Miðvikudagskynningin á Facebook
no images were found
Sjö meðlimir FBSR á tveimur jeppum eru nú við hálendisgæslu að Fjallabaki. Föst viðvera er í Landmannalaugum auk þess sem jepparnir keyra vítt og breitt um svæðið í eftirlitsferðum. Fyrstu tvo dagana hefur mest verið um aðstoð vegna bilaðra og strandaðra ökutækja. Talsvert er um að ferðafólk horfi á vegi á kortinu og ætli að „skreppa“ langa og torfæra slóða á vanbúnum bílum. Þeim er snarlega bent á hentugri leiðir. FBSR liðar verða fram á sunnudag á svæðinu með dráttartóg, plástra og kort á lofti. Afar vel fer um mannskapinn og vill liðið koma á framfæri þökkum til Mjólkursamsölunnar, Krónunnar, Ölgerðarinnar, Kjötsmiðjunnar, Ó. Johnson & Kaaber, Myllunnar, Kjarnafæðis og Sölufélags Garðyrkjumanna fyrir veittar kaloríur.
no images were found
Húnatónleikar 11. júlí í Reykjavíkurhöfn
Næstkomandi fimmtudag klukkan 20:00 mun áhöfnin á Húna sigla til Reykjavíkur og halda risatónleika í Gömlu höfninni í Reykjavík. Sem fyrr ætlar áhöfnin að styrkja björgunarsveitirnar með því að gefa alla vinnu sína og rennur aðgangseyrir beint til björgunarsveitanna í Reykjavík.
Tónlistarmenninir munu spila um borð í bátnum Húna, sem vaggar létt utan bryggjunnar við Vesturhöfnina (rétt hjá Sjóminjasafninu og CCP húsinu) fyrir áhorfendur í landi. Allir velkomnir, jafnt ungir sem aldnir, en frítt er inn fyrir börn yngri en 12 ára. Fólk er hvatt til að mæta tímanlega og að nýta sér almenningssamgöngur, hjól eða tvo jafnfljóta. Ef þörf er að koma á bíl er mælst til þess að fólk keyri Hringbrautina og keyri út á Granda til að finna stæði þar.
Staðsetning: Gamla höfnin í Reykjavík, milli Sjóminjasafnsins og Slippsins.
Tími: 20:00 til 21:30.
Aðgangseyrir: 1500, frítt fyrir 12 ára og yngri.
Inngangar: 1)Á mótum Hlésgötu og Mýrargötu. 2)Við Mýragötu, norðan við Bakkastíg. 3)Á mótum Grandagarðs og Rastargötu.
Á Granda og bílastæðin við Kolaportið.
Tónleikasvæðið
Nánari upplýsingar um Áhöfnina á Húna og ferðalag þeirra í júlí er að finna á www.ruv.is/huni og https://www.facebook.com/events/578131598894317/
no images were found
Stuttu eftir vel heppnaða útsendingu um bakvarðasveit Landsbjargar í Ríkissjónvarpinu, þar sem starf björgunarsveitanna var kynnt frá fjölmörgum sjónarhornum, barst heildarútkall um leit að konu í Heydal við Mjóafjörð á Vestfjörðum. Héldu þá fjórir meðlimir sjúkra- og leitarsviðs FBSR vestur. Sviðstjóri leitarsviðs var staddur á Þingeyri þegar útkallið barst og gekk til liðs við hóp frá Björgunarsveitinni Dýra, sem starfar á Þingeyri. Þegar komið var vestur gengu þrír erlendir sumarstarfsmenn hjá ferðaþjónustunni í Heydal í lið með teyminu frá FBSR og stóðu sig með eindæmum vel. Fyrstu verkefni voru svæðisleit í rjóðurvöxnu fjallendi, sem gerði leitina afar seinfæra.
Fis sveit FBSR, mönnuð þeim Stefáni Má og Gylfa, fór í loftið frá Reykjavík kl. 14. Vegna skýjahulu þurfti að sæta sjónflugi og þræða eftir landslagi og skýjafari. Eftir komuna vestur um kl. 16 gjörleitaði fissveitin svæðin suður og vestur af Heydal úr lofti og við það var hægt að útiloka stóran hluta leitarsvæða. Eftir kvöldmat skipti fis hópur leitarsvæðum með Landhelgisgæslunni og björgunarmönnum var úthlutað nýjum leitarsvæðum. Liðsauki úr Reykjavík var á leiðinni, þar á meðal 4 leitarmenn frá FBSR. Halda áfram að lesa
no images were found
Nú styttist í Landsþing Landsbjargar, sem fram fer dagana 24. -25. maí. Á landsþinginu verða haldnir hinir geysivinsælu björgunarleikar þar sem hópar frá björgunarsveitum af öllu landinu keppa sín á milli í lausnum krefjandi og skemmtilegra verkefna. Nokkrir hópar frá FBSR ætla sér að taka þátt í þetta sinn, þeirra á meðal hópur skipaður nýliðum, sem gengu inn í sveitina á aðalfundi í vikunni sem leið. Þau hafa á síðustu vikum æft stíft fyrir leikana og fóru meðal annars í allskyns sig- og júmmæfingar í Elliðaárdal fyrir stuttu síðan. Þar var farið undir og í kringum gömlu brúna við Árbæjarlaug með því að síga fram af henni og fara undir hana áður en svo var júmmað sig upp aftur.
Þá hefur einnig verið farið yfir ýmis björgunarkerfi, línuvinnu, fyrstu hjálp og aðra kunnáttu sem björgunarmenn þurfa að búa yfir. Áhugavert verður að sjá hvort þessar metnaðarfullu æfingar muni skila sér í góðum árangri fyrir norðan eftir 2 vikur.
Á meðfylgjandi myndum gefur að líta æfingarnar við Elliðaá.
no images were found
Miðvikudaginn 8. maí 2013 var aðalfundur FBSR haldinn í húsakynnum sveitarinnar að Flugvallarvegi. Á fundinum var tekinn inn fríður hópur 16 nýrra félaga, sem lokið hafa tveggja ára nýliðaþjálfun hjá sveitinni. Við óskum þeim innilega til hamingju og hlökkum til að starfa með þeim í framtíðinni.
no images were found
Á fundinum var kosið í 6 embætti stjórnar:
Jóhannes Ingi Kolbeinsson, formaður
Kristbjörg Pálsdóttir, meðstjórnandi til eins árs
Björn J. Gunnarsson, meðstjórnandi til tveggja ára
Þorsteinn Ásgrímsson Melén, meðstjórnandi til tveggja ára
Magnús Andrésson, varamaður 1
Þráinn Fannar Gunnarsson, varamaður 2
Auk ofangreindra situr Jón Svavarsson áfram sem meðstjórnandi til eins árs. Á fundinum voru endurskoðendur sveitarinnar einnig kosnir, þeir Sigurjón Hjartarson, Guðmundur Magnússon og Grétar Felixson (til vara).
Samþykkt var lagabreytingartillaga sem hækkar lágmarksaldur nýliða úr 17 í 18 ár þegar þjálfun hefst, en veita má undanþágu fylli viðkomandi 18 ár á árinu.
Á kosningardaginn 27. apríl var farið í jeppaferð, með í för voru 6 einkabílar og patrolinn FBSR 5 frá Flugbjörgunarsveitinni í Reykjavík. Alls fylltu 24 manns og einn hundur þessi farartæki. Til stóð að keyra frá Reykjavík um kl. 09.00 og vera komin í Skálpanes um eða eftir hádegi, grilla kjöt og pulsur þar í grennd, leyfa börnunum að renna sér aðeins og leika í snjónum, keyra síðan í bæinn. Þetta var áætlunin í grófum dráttum en að sjálfsögðu stóðst hún engan vegin enda teldist þetta vart alvöru jeppaferð FBSR ef við hefðum haldið áætlun.
Við keyrðum á Þingvelli og inn Kaldadal, þegar við vorum komin að snjólínu hleyptum við hóp af Ísak bílum framhjá okkur. Þar sem sumir voru byrjaðir að spóla var hleypt aðeins úr dekkjunum líka. Eftir skamma stund voru Ísak-jepparnir fyrir framan okkur fastir og við þurftum því að bíða. Þá settum við FBSR 5 í 8 pund en ekki leið á löngu áður en þurfti að spila nokkra bíla. Fórum svo niður í 4 pund og gekk ágætlega þó nokkurn spöl nema hvað ákveðin L200 var alltaf að grafa sig eitthvað niður.
Þegar við náðum loks í litla kofann við línuveginn á Kaldadal um þrjú leytið, var orðið heldur hvasst svo það var bara huggulegt að troðast þarna inn og allir mjög sáttir að fá eitthvað ofan í tómann magann. Þar voru valkostirnir um heimleið ræddir og ákveðið að fara á Geysi þar sem Sverrir og krakkarnir gætu fengið sér ís. Eftir síðasta brattann var pumpað í dekkin og Kjalvegurinn keyrður niður að Gullfossi en þegar komið var á Geysi var búið að loka sjoppunni. Þá skelltum við bara í hópmynd og héldum svo heim á leið. Það verður ekki sagt að veður og útsýni hafi leikið við okkur en sólin lét nú alveg sjá sig inná milli og við fengum heldur betur að spila bíla og sumir Candy Crush. Flott ferð og mannskapurinn kom ánægður heim!!!
no images were found
Texti og myndir: Salbjörg Guðjónsdóttir
no images were found
Aðalfundur Flugbjörgunarsveitarinnar í Reykjavík verður haldinn þann 8. maí 2013 kl. 20:00 í húsi sveitarinnar að Flugvallarvegi.
Dagskrá fundarins:
1. Formaður setur fund.
2. Kosning fundarstjóra og fundarritara
3. Skýrsla stjórnar og umræður um hana.
4. Endurskoðaður rekstrar og efnahagsreikningur 2012, samþykktur af félagslega kjörnum endurskoðendum og umræður um hann.
5. Inntaka nýrra félaga.
6. Hlé – Kaffiveitingar á vegum kvennadeildarinnar, kr. 1.500 (í reiðufé)
7. Kosning formanns (til eins árs).
8. Kosning tveggja meðstjórnenda (árlega til tveggja ára).
8.a Kosning meðstjórnanda til eins árs í stað fráfarandi stjórnarmanns
9. Kosning tveggja varastjórnenda (til eins árs).
10. Kosning tveggja endurskoðenda og eins til vara.
11. Tillaga að lagabreytingu, umræða og kosning
12. Önnur mál
Lagabreytingatillaga hefur löglega borist stjórn og er svo hljóðandi:
„Við undirritaðir Marteinn Sigurðsson og Stefán Þórarinsson gerum það að tillögu okkar að 1. Lið í 3. Grein laga FBSR sem hljóðar svo „Að verða minnsta kosti 17 ára á því ári sem þjálfun byrjar“ verði breytt og mun hljóða svo „Að vera 19 ára þegar þjálfun hefst en undanþágu má gera hafi viðkomandi orðið 18 ára á árinu sem þjálfun hefst“.
Við hvetjum alla félaga til að mæta á aðalfundinn og hafa áhrif á þær ákvarðanir sem þar verða teknar.
Sumardagurinn fyrsti var haldinn hátíðlegur í Víkinni eins og venja hefur verið. Byrjað var á grilli við Grímsbæ og síðan var haldið í skrúðgöngu að Bústaðakirkju. Eftir kirkju hófst svo dagskráin í Víkinni þar sem krakkarnir gátu skemmt sér í hoppukastala, farið í ratleik, fengið andlitsmálun og margt fleira skemmtilegt á meðan hljómsveitin Yellow Void og fleiri skemmtu með söngatriðum.
Gestir hátíðarinnar gátu einnig látið reyna á krafta sína með því að draga Patrol frá Flugbjörgunarsveitinni í Reykjavík. Nokkrir meðlimir FBSR höfðu útbúið doubblunina 9:1 og 5:1 þannig að lítil kríli gátu dregið jeppann fram og tilbaka. Krakkarnir fengu líka að kíkja inn í bílinn, skoða tæki og tól og svo var heilmikil ýlaleit í gangi á sama tíma. Sumardagurinn fyrsti bauð uppá snjókomu og sól þess á milli en ungir sem aldnir skemmtu sér og sáum við jafnvel efni í tilvonandi flubba.
no images were found
Texti og myndir: Salbjörg Guðjónsdóttir