Langar þig til að sjá hvernig björgunarsveitir starfa? Boðið er uppá tvær opnar æfingar laugardaginn 2. oktober. Það eru :
12-12:30 – Malargryfjur við Háskólann í Reykjavík
14-15:00 – Miðbakki Reykjavíkurhöfn
Greinasafn eftir: stjorn
Rauður Október II
Þegar þetta er skrifað eru 66 klukkustundir þar til afmælisæfing Flugbjörgunarsveitarinnar, Rauði Október II hefst og undirbúningur á lokastigi. Alls hafa á fjórða hundrað þáttakendur boðað sig til leiks svo að ljóst er að yfir 500 björgunarmenn verða samankomnir á æfingunni næsta laugardag.
Upplýsingamöppum um æfinguna verður dreift til sveita á höfuðarborgarsvæðinu næstkomandi föstudag en aðrar sveitir fá þær afhentar við komu á laugardagsmorgun.
Annars er dagskráin 2.október sem hér segir;
- 06:00 Æfing hefst, hópar með möppur tilkynna sig inn og fá verkefni. Hópar utan af landi mæta í hús FBSR, fá verkefni og möppur.17:00-20:00 Grillveisla í boði FBSR við hús sveitarinnar
- 17:00-20.00 Sundlaugarferð í Laugardalslaugina í boði FBSR og ÍTR
- 20:00 Dagskrá og æfingu lýkur formlega
Allar nánari upplýsingar fást hjá æfingastjóra, Jónasi Guðmundssyni í síma 897-1757.
Sjáumst kát og hress á Rauða Október II
Æfingastjórn
Rauður október II
Nú eru aðeins fjórir dag í eitt stærsta verkefni sem FBSR hefur staðið
fyrir í fjölda ára, afmælisæfinguna Rauði Október II en hún fer fram
næstkomandi laugardag. Alls hafa rúmlega 300 björgunarmenn tilkynnt um
þáttöku en auk þeirra eru um 100 sjúklingar og annað eins af flubbum við
umsjón æfingarinnar. Þeir flubbar sem ennþá eru verkefnalausir hafði samband við [email protected]!
Ferðasaga – Afmælisferð á Bárðarbungu 10.-12.september 2010
Eins og hvert mannsbarn veit, var Flugbjörgunarsveitin í Reykjavík stofnuð stuttu eftir að Loftleiðavélin Geysir brotlenti á Bárðarbungu haustið 1950. Í tilefni af komandi stórafmæli sveitarinnar var ákveðið að halda í hópferð á söguslóðir. Hluti hópsins gekk á Bunguna og fer hér á eftir sagan af þeim leiðangri.
Göngufólki var skutlað inn að Svarthöfða í Vonarskarði með hjálp bílstjóra úr Kyndli og Kili á föstudagskvöldi, 10. september. Kjötsúpa og franskbrauð með hollum skammti af smjöri runnu ljúflega niður í eldhústjaldinu áður en haldið var í háttinn.
Við birtingu, um klukkan hálf sex á laugardagsmorgni spruttu göngumenn út úr tjöldum sínum allir útsofnir og eldhressir. Tveimur klukkutímum síðar lögðu 23 Flubbar og 4 nýliðar, af stað upp Köldukvíslarjökul, í humátt á eftir fararstjóra sínum, Jóni Þorgrímssyni, og aðstoðarmönnum hans. Leiðin var greið, svolítill ís sem þó var stamur og því auðveldur til uppgöngu.
Göngumenn þurftu brátt að stikla og stökkva yfir minni sprungur og settu því á sig ísbrodda til að tryggja öryggi sitt. Eftir örfáa kílómetra fór að bera á hælsærum hjá mörgum í hópnum og var því stoppað og hælar plástraðir.
Haldið var áfram í yndislegu veðri, útsýni og góðu færi. Þegar komið var í um 1600 m hæð fór mannskapurinn í línur, enda jökullinn farinn að sýna sínar dýpstu hliðar. Þegar upp á sléttuna kom varð gangan heldur tilbreytingarlítil en áfram var haldið í leit að punkti sem sýndi
metrana yfir 2000. Þegar á hæsta punkt kom var lítið skyggni og nett snjókoma! Eftir stutt köku- og myndastopp var haldið niður og gekk það snurðulaust.
Á niðurleiðinni gengu menn fram á hræ af dýri en voru ósammála um hvers kyns dýr væri að ræða. Líklega var þetta hreindýrskálfur! Eftir um þrettán klukkustunda og 34 km göngu komu göngumenn sælir af jökli að bílunum sem biðu þeirra. Á meðan göngumennirnir tíndust inn í bílana, einn af öðrum, skyggði og í myrkrinu var haldið inn í Nýjadal þar sem beið lamb á diski og dash af súkkulaðiköku í eftirmat. Seint og síðar meir sofnuðu allir þreyttir og sælir og dreymdi klaka, sprungur og hljóðið í broddum. Göngumenn bíða nú spenntir eftir sjötugsafmælinu.
Takk fyrir okkur
Krunka og hjálpsömu nýliðarnir Sveinn og Védís
Starfsmaður óskast
Flugbjörgunarsveitin í Reykjavík leitar eftir áhugasömum einstakling sem gæti tekið að sér stöðu starfsmanns FBSR í tímabundið starf.
Starfið er í samstarfi við Vinnumálastofnun og því er nauðsynlegt að viðkomandi sé á atvinnuleysisskrá. Starfið er tímabundið til 6 mánaða og æskilegt að viðkomandi geti hafið störf sem fyrst. Nánari upplýsingar um skilmála Vinnumálastofnunar má finna á slóðinn www.vinnumalastofnun.is/vinnumarkadsurraedi/ataksverkefni-9gr/. Nánari upplýsingar um starfið veitir formaður – formadur(hja)fbsr.is
Umsóknarfrestur rennur út 30.september 2010.
Starfið felst meðal annars í:
Aðkomu að jólatrjáa- og flugeldasölu
Aðstoð við þjálfunarmál
Viðhald á húsnæði og bílum eftir þörfum og getu starfsmanns
Fjáraflanir
Ýmis skrifstofuvinna, s.s. útsending fréttabréfs, umsjón með heimasíðu.
Annað tilfallandi
Ekki er gerð sérstök krafa um menntun eða reynslu. Öllum umsóknum verður svarað.
Umsóknir ásamt ferilsskrá skal senda á formadur(hja)fbsr.is.
Haustfundur
Haustfundur Flugbjörgunarsveitarinnar í Reykjavík verður haldinn þriðjudaginn 21.september klukkan 20:00.
Við hvetjum alla félaga til að koma á haustfundinn, sýna sig og sjá aðra.
Útkall
Björgunarsveitir af Svæði 1 voru kallaðar út í dag 9.9.10, til leitar að 17 ára stúlku sem saknað var í Grafarvogi. Stúlkan fannst síðan heil á húfi um einum og hálfum tíma eftir að útkall barst. Ellefu félagar úr FBSR, þar af 4 á hjólum, komu að leitinni.
Nýafstaðin helgi
Nú er vetrardagskráin komin á fullt skrið. Nýafstaðnar nýliðakynningar gegnu vel og skiluðu flestir sér á fyrsta námskeið fyrsta árs nýliða um búnað á fjöllum sem Óli hélt síðastliðin laugardag. Nýliðar á öðru ári skelltu sér inn í Þórsmörk um helgina þar sem Atli Þór bleytti vel í þeim í Krossánni í þverun straumvatna. Skemmst er frá því að segja að allir viðstaddir skemmtu sér konunglega í öskudrullugri ánni og komu heilir heim. Myndir frá þverun straumvatna má sjá á eftirfarandi slóð:
http://picasaweb.google.com/david.karna/20100903FBSRInVerunStraumvatna#
Nýliðakynningar
Hefur þú hugleitt að snjór geti verið eitthvað annað en það sem er fyrir manni í umferðinni? Gætir þú hugsað þér að stunda fjallamennsku, jeppamennsku, vélsleða eða jafnvel fallhlífastökk? Ert þú þessi týpa sem gætir hugsað þér að vera til taks þegar aðrir eru í neyð? Ert þú 18 ára á árinu eða eldri? Kannski áttu þá erindi til okkar!
Nýliðakynningar Flugbjörgunarsveitarinnar í Reykjavík verða haldnar þriðjudaginn 31. ágúst og fimmtudaginn 2. september kl. 20.00 í húsnæði sveitarinnar við Flugvallarveg.
Opið hús á Menningarhátíð 21.ágúst
Flugbjörgunarsveitin í Reykjavík er 60 ára í ár. Í tilefni af afmælinu stendur mikið til. Ævintýrið byrjar á Menningarhátíð Reykjavíkurborgar laugardaginn 21. ágúst n.k. milli kl. 13:00 og 18:00.
Þá mun verða opið hús fyrir almenning miðsvæðis í aðalstöðvum sveitarinnar við Flugvallarveg. Þar munu sveitarmenn taka á móti gestum og gangandi og sína þeim búnað, spjalla um skemmtilegt starf sveitarinnar og um svaðilfarir á fjöllum. Öll svið sveitarinnar verða með kynningu: Fjallasvið, bílasvið, beltasvið, leitarsvið, sjúkrasvið, fallhlífasvið og síðast en ekki síst lávaraðarnir sem munu kynna sögu sveitarinnar. Félagar sveitarinnar munu líka vera í samstarfi við Norrænt kóramót í Reykjavík en kórarnir 60 njóta aðstoðar Flugbjörgunarsveitarinnar við rötun með því að halda merki sveitarinnar á lofti til leiðbeiningar fyrir kórfélaga. Þá munu sveitarmenn setja upp björgunarfalhllíf í byggingarkrana Eyktar sem stendur á gamla Nýja Bíós reitnum á gatnamótum Lækjargötu og Bankastrætis. Sveitarmenn munu standa undir fallhlífinni og ræða við gesti og gangangi um fjallamennsku, fallhlífarstökk og frækilegar björgunaraðgerðir. Komið í heimsókn, hittið okkur, fáið ykkur kaffi og vöfflu, hlustið á kórana sem syngja hjá okkur og síðast en ekki síst: Verðið traustir félagar okkar!